Ya Rab!Dil Muslim Ko Wo Zinda

دعا 

يا رب! دلِ مسلم کو وہ زندہ تمنا دے
جو قلب کو گرما دے، جو روح کو تڑپا دے

پھر وادئ فاراں کے ہر ذرے کو چمکا دے
پھر شوقِ تماشا دے، پھر ذوقِ تقاضا دے

محروم تماشا کو پھر ديدۂ بِينا دے
ديکھا ہے جو کچھ ميں نے اوروں کو بھی دکھلا دے

بھٹکے ہوئے آہو کو پھر سوئے حرم لے چل
اس شہر کے خوگر کو پھر وُسعت صحرا دے

پيدا دلِ ويراں ميں پھر شورشِ محشر کر
اس محمل خالی کو پھر شاہدِ ليلا دے

اس دور کی ظلمت ميں ہر قلب پريشاں کو
وہ داغِ محبت دے، جو چاند کو شرما دے

رفعت ميں مقاصد کو ہمدوشِ ثريا کر
خوددارئ ساحل دے، آزادئ دريا دے

بے لوث محبت ہو، بے باک صداقت ہو
سينوں ميں اجالا کر، دل صورتِ مينا دے

احساس عنايت کر، آثار مصيبت کا
امروز کی شورش ميں انديشۂ فردا دے

ميں بلبل نالاں ہوں اک اجڑے گلستاں کا
تاثير کا سائل ہوں، محتاج کو، داتا دے

علامہ اقبال